Mae Theatr a Chanolfan Gelfyddydau Glan yr Afon, Casnewydd yn falch iawn o gyhoeddi y bydd clyweliadau i ddod o hyd i'r cwmni ifanc ar eu pantomeim Beauty and the Beast yn cael eu cynnal yng Nglan yr Afon Ddydd Sul 11 Medi rhwng 10am a 3pm gyda chofrestru am 9.30am. Croeso i bob person ifanc talentog!
Bydd Beauty and the Beast yn cynnwys cast talentog iawn sy'n cynnwys wynebau cyfarwydd, fel Richard Elis, ffefryn Casnewydd! Bydd y pantomeim proffesiynol, safon uchel hwn sy’n addas i deuluoedd yn llawn hud, lliw a chwerthin a bydd perfformiadau i’w cael rhwng Dydd Mercher 29 Tachwedd a dydd Sadwrn 6 Ionawr 2024. Bydd hefyd yn cynnwys tri thîm o blant mewn perfformiadau canu a dawnsio llawn hwyl, a fydd yn cael eu dewis trwy’r clyweliadau hyn.
Mae Glan yr Afon yn chwilio am 18 o blant a phobl ifanc a fydd yn cael eu dewis, i ffurfio tri chwmni ifanc o 6 o blant, a fydd yn perfformio ar ddiwrnodau gwahanol y pantomeim. Mae Glan yr Afon yn awyddus i weld 'personoliaethau' plant yn ogystal â'u sgiliau dawnsio ac actio. Mae'n bwysig bod pob clyweliad yn hyderus ar draws y ddau faes - dawnsio ac actio.
Bydd y clyweliad yn cynnwys y bobl ifanc yn dysgu dawns fer, gan ganu fel grŵp. Efallai y byddwn ni hefyd yn gofyn iddyn nhw adrodd cerdd fer iawn neu jôc o'u dewis. Mae croeso i bob plentyn talentog, p'un a ydynt yn mynd i'r ysgol ddrama, yn astudio drama neu ddawns yn yr ysgol neu'n edrych i esgyn llwyfan am y tro cyntaf.
Dylai pobl ifanc sy’n mynd i’r clyweliadau wisgo dillad cyfforddus ac esgidiau sy'n addas ar gyfer symud a dawnsio. Ni ddylai dillad fod â brand nac wedi’i gwneud o ddeunydd sgleiniog, gan na fydd rhifau'n glynu wrth y rhain. Ni fydd angen i’r bobl ifanc sy’n mynd i glyweliadau baratoi unrhyw beth ond efallai y bydd eisiau dod â dŵr a byrbrydau.
Mae'r clyweliadau ar agor i blant a phobl ifanc sy'n byw ym mwrdeistrefi Casnewydd, Caerdydd a Thorfaen yn unig. Yr isafswm oedran yw 9 oed ar ddiwrnod cyntaf yr ymarfer (13 Tachwedd 2023) a'r uchafswm oedran yw 15 oed ac 11 mis ar ddiwrnod olaf y gyfres o berfformiadau (6 Ionawr 2024). Bydd rhestr o berfformiadau a’r ymrwymiadau ymarfer ar gael ar y dydd. Mae’n hanfodol bod plant a ddewisir yn gallu ymrwymo i gyfnod llawn y pantomeim, a fydd yn cynnwys nifer bychan o ddyddiadau yn ystod tymor yr ysgol yn ogystal ag ambell berfformiad ar y penwythnos.
Bydd pob cast llwyddiannus yn amodol ar gymeradwyaeth drwyddedu.
Er mwyn ein helpu i reoli amseru ar y dydd ac i roi syniad i ni o bresenoldeb, os ydych yn bwriadu ymuno â ni ar gyfer y clyweliadau, llenwch y ffurflen fer hon.
I gael rhagor o wybodaeth am y clyweliadau, cysylltwch â Swyddfa Docynnau Glan yr Afon ar 01633 656757.
GWYBODAETH CLYWELIADAU:
Lleoliad: Theatr a Chanolfan Gelfyddydau Glan yr Afon, Kingsway, Casnewydd NP20 1HG
Dyddiad: Dydd Sul 10 Medi 2023
Amser:
- Cofrestru yn agor am 9.30am
- Clyweliadau 10am – 3pm (ni fydd modd gweld unrhyw un yn y clyweliad nad yw wedi cofrestru)
Ymarferion: 13 Tachwedd 2023 tan 28 Tachwedd 2023
Dyddiadau'r sioeau: 29 Tachwedd 2023 i 6 Ionawr 2024
Cynhelir yr ymarferion ar ôl ysgol o’r wythnos sy’n dechrau ar 13.11.23 a’r wythnos sy’n dechrau ar 20.11.23 ac rhwng 10am a 6pm Ddydd Sadwrn 18 a 25 Tachwedd. Mae’r amserau galw i’w cadarnhau ar gyfer Dydd Gwener 25 a Dydd Llun 28 Tachwedd.
Sylwch nad oes lle parcio ar y safle yng Nglan yr Afon. Mae maes parcio cyhoeddus ger Glan yr Afon, yn Friars Walk a hefyd ar draws y ffordd yng Nghanolfan Kingsway.
