Rydym yn chwilio am wirfoddolwyr i gefnogi'r gwaith o gyflwyno gŵyl theatr stryd heb docynnau ac am ddim fwyaf Cymru, ‘Y Sblash Mawr’ ar ddydd Sadwrn 22 a dydd Sul 23 Gorffennaf 2023.
Ynglŷn â Gŵyl y Sblash Mawr
Mae'r Sblash Mawr yn ŵyl sy'n addas i deuluoedd sy'n digwydd yn Theatr a Chanolfan Gelfyddydau Glan yr Afon ac ar strydoedd dinas Casnewydd, dros benwythnos 22-23 Gorffennaf 2023.
Mae'r penwythnos yn llawn perfformiadau theatr stryd cyffrous a llawn cyffro gan artistiaid o Gasnewydd, a gweddill Cymru a'r DU yn ogystal â gweithdai, cerddoriaeth fyw, stondinau a pherfformiadau cymunedol.
Cynhelir yr ŵyl rhwng 11am a 7:30pm ddydd Sadwrn 22 a rhwng 11:30am a 4:30pm ar ddydd Sul 23.
Trefnir y Sblash Mawr gan dîm Theatr a Chanolfan Gelfyddydau Glan yr Afon sy'n rhan o'r ymddiriedolaeth elusennol, Casnewydd Fyw. Fe'i hariennir gan Casnewydd Fyw, Cyngor Celfyddydau Cymru ac fe'i noddir gan Friars Walk, Ardal Gwella Busnes Casnewydd a Bws Casnewydd.
Manteision Gwirfoddoli
· Bod yn rhan o dîm lleol o bobl frwdfrydig ac angerddol ar ddigwyddiad yng nghanol y ddinas
· Datblygu eich gwybodaeth a'ch sgiliau yn y sector celfyddydau awyr agored
· Ennill profiadau newydd a chynorthwyo datblygiad eich gyrfa
· Helpu i roi mynediad i bobl Casnewydd i brofiad celfyddydol gwych a rhad ac am ddim
· Cefnogi lles pobl Casnewydd
Beth fydd angen ei wneud fel gwirfoddolwr
Mae gwirfoddolwyr yn helpu i gefnogi'r gwaith o gyflwyno gŵyl y Sblash Mawr. Byddwch wedi'ch lleoli mewn parth (sy'n debygol o fod yn yr awyr agored) ar safle'r ŵyl a byddwch yn cael eich rheoli gan Arweinydd Parth dynodedig fydd yn rhoi amrywiaeth o wahanol weithgareddau i chi eu gwneud i gefnogi'r ŵyl gan gynnwys:
· Cynorthwyo perfformwyr i fynd i leoliadau
· Monitro eich ardal a gweithio gydag Arweinydd y Parth, stiwardiaid a chydweithwyr eraill i sicrhau bod y parth yn rhedeg yn ddidrafferth
· Rhannu gwybodaeth gyda mynychwyr a chynulleidfaoedd yr ŵyl a'u helpu
· Cynrychioli Glan yr Afon a Chasnewydd Fyw
· Rhoi gwybodaeth am yr ŵyl i aelodau'r cyhoedd
Bydd angen i chi fynychu sesiwn hyfforddi 2 awr ar ddechrau mis Gorffennaf. Bydd angen i chi fod ar gael am o leiaf 4 awr dros benwythnos y Sblash Mawr.
Am bwy rydyn ni’n chwilio?
Rydym yn chwilio am bobl frwdfrydig, gyfeillgar a dibynadwy 18 oed ac yn hŷn i fod yn rhan o'n tîm gwirfoddolwyr.
Os hoffech fod yn rhan o dîm gwirfoddolwyr y Sblash Mawr eleni, llenwch ffurflen gais gyda'ch manylion a'ch argaeledd a'i hanfon i'r riverfront.boxoffice@newportlive.co.uk erbyn 7 Gorffennaf 2023 gyda’r teitl GWIRFODDOLWR Y SBLASH MAWR 2023.
