Mae’n bleser gan Theatr a Chanolfan Gelfyddydau Glan yr Afon a Casnewydd Fyw eto fod yn cynnal eu prosiect Rhannu'r Cariad yng Nghasnewydd a'r cyffiniau ym mis Chwefror eleni.
Yn ystod mis Chwefror bydd Glan yr Afon yn creu ac yn dosbarthu pecynnau celf a gofal i unigolion a grwpiau yn y gymuned. Gall y cyhoedd hefyd gymryd rhan ac enwebu rhywun yr hoffent dderbyn pecyn, sydd i'w weld ar wefan Rhannu'r Cariad.
Yn ogystal â hyn bydd arddangosfa ar Lan yr Afon gan yr artist Kate Mercer o'r enw 'Make do and Mend' drwy gydol mis Chwefror a Mawrth. Mae 'Make Do and Mend' yn gyfres o gwiltiau clytwaith sy'n archwilio syniadau am lapio, cynhesu ac amddiffyn. Yn benodol, mae'r cwiltiau clytwaith hyn yn cael eu gwneud o ffabrig cotwm wedi'i ailgylchu, wedi'i ailwampio'n rhywbeth sy'n cynhesu ac yn cysuro'r rhai y maent yn eu lapio. Gan gofleidio eraill gyda geiriau drwy decstiliau, ffotograffiaeth a pherfformiadau mae’r cwiltiau hyn yn archwilio’r cartref a gwaith nodwyddo yn y celfydyddydau.
Mae Glan yr Afon yn gwahodd y cyhoedd i gymryd rhan yn yr arddangosfa drwy anfon delweddau neu ysgrifennu yn seiliedig ar y thema a fydd yn cael ei harddangos wrth ymyl gwaith Kate yn Oriel Mesanîn. Gellir gollwng cyflwyniadau yn Nglan yr Afon neu eu e-bostio i sally-anne.evans@newportlive.co.uk.
Drwy gydol mis Chwefror mae Glan yr Afon wedi ymrwymo i ddarparu un weithred o garedigrwydd ar hap y dydd i unigolion sy'n ymweld â'r ganolfan gelf.
Meddai Sally-Anne Evans, Swyddog Datblygu Celfyddydau Cymunedol Glan yr Afon:
'Roedd Rhannu'r Cariad yn brosiect mor bwysig i ni y llynedd tra bod yr adeilad ar gau. Fel llawer o rai eraill, ar adegau roeddem yn teimlo'n ynysig ac yn unig yn methu agor, gweld ein cydweithwyr neu ein cynulleidfaoedd. Roeddem am wneud rhywbeth i godi hwyliau cymaint o bobl â phosibl ac roeddem wrth ein bodd yn derbyn yr holl waith celf a darllen yr holl farddoniaeth wych a anfonwyd i mewn.
Eleni, gan ein bod bellach yn ôl ar agor, roeddem am wneud rhywbeth i ddiolch i'n hymwelwyr, rhoi rhywbeth yn ôl iddynt ac yn y pen draw gwneud iddynt wenu, sef o ble y daw ein syniad am fis Caredigrwydd ar Hap. Diolch i'n cynulleidfaoedd am ein cefnogi. Galwch heibio i Lan yr Afon yn ystod mis Chwefror ac efallai y byddwch chi’n cael sypreis ar hap gennym ni!'
Lansiwyd ‘Rhannu’r Cariad’ ar Ddydd Santes Dwynwen yn ystod y cyfnod clo yn 2021. Fe’i crëwyd am fod Casnewydd Fyw a Glan yr Afon am helpu pawb i gadw'n hapus ac yn iach a rhannu cariad a charedigrwydd ledled ardal Casnewydd.
Roedd y prosiect yn cynnwys anfon pecynnau lles i gefnogi pobl a oedd wedi'u hynysu i'w helpu i deimlo'n fwy cysylltiedig, bod yn greadigol a chanolbwyntio ar iechyd meddwl a chorfforol. Gofynnwyd i'r cyhoedd hefyd gymryd ysbrydoliaeth o waith CONSUMERSMITH, 'May Love Be What You Remember Most,' a arweiniodd at Lan yr Afon yn derbyn amrywiaeth o waith celf a chyflwyniadau barddoniaeth gwych a arddangoswyd yn ffenestri llawr gwaelod yr adeilad.
Mae Rhannu’r Cariad yn brosiect sy’n cael ei gynnal gan dimau’r Celfyddydau a Chwaraeon Cymunedol Casnewydd Fyw ac mae’n bosibl, diolch i’r rhoddion a dderbyniwyd gan ein haelodau a’n cwsmeriaid yn ogystal â chyllid gan Gyngor Dinas Casnewydd. Gallwch gael rhagor o wybodaeth am Rhannu’r Cariad at newportlive.co.uk/ShareTheLove.
I gael gwybod mwy am sut y gallwch gefnogi Ymddiriedolaeth Elusennol Casnewydd Fyw a phrosiectau fel y rhain ewch i newportlive.co.uk/SupportUs.
