Y mis Chwefror hwn, mae Theatr a Chanolfan Gelfyddydau Glan yr Afon yn hynod falch o gefnogi ‘Ein Llais 2023’, digwyddiad rhannu anffurfiol blynyddol Rhwydwaith Ein Llais | Our Voice Network yn Theatr Glan yr Afon, Casnewydd, ddydd Sadwrn 25 Chwefror, gyda dehongliad llawn mewn Iaith Arwyddion Prydain (BSL) gan Nez Parr.
Heb risg, ni all celfyddyd arloesi; ni all ddatblygu, ac ni all yr artist gyrraedd eu llawn botensial. Mae digwyddiad rhannu Ein Llais 2023 yn rhoi cyfle i artistiaid gymryd risg mewn ystafell llawn pobl sydd yno i ymgysylltu â’r broses, ac nid dim ond i wylio cynhyrchiad.
Bydd y digwyddiad rhannu hwn yn darparu gofod i lwyfannu artistiaid, ac i ddod â phobl at ei gilydd i gysylltu a thrafod eu hangerdd dros y celfyddydau a diwylliant.
Artistiaid rhannu Ein Llais 2023 yw: enillwyr Bwrsari Ein Llais – Karema Ahmed, cantores a chyfansoddwr caneuon, a Stephanie Stevens, actor, awdur, cantores; ynghyd â’r actor a’r awdur Nadia Nur; a Krystal S. Lowe, dawnsiwr, coreograffydd, a sefydlydd Rhwydwaith Ein Llais.
Mae’r holl incwm o werthiant tocynnau’n mynd tuag at ariannu gwaith Rhwydwaith Ein Llais | Our Voice Network.
Mae Our Voice Network | Rhwydwaith Ein Llais yn bodoli i rymuso, datblygu a llwyfannu artistiaid o’r Mwyafrif Byd-eang drwy gyfleoedd datblygiad proffesiynol, digwyddiadau arddangos a bwrsarïau. Ewch i krystalslowe.com/our-voice-network am ragor o wybodaeth.
Meddai Krystal S. Lowe, ‘Bydd pob un ohonom ni, yr artistiaid, yn rhannu darn o waith celf anorffenedig, heb ei berffeithio, drwy ganu, actio, a/neu ddawnsio – mae’r cyfan yn waith rydym ni wedi ei ysgrifennu a’i ddatblygu ein hunain. Es ati i sefydlu’r digwyddiad rhannu blynyddol hwn i greu gofod er mwyn i artistiaid rannu’r broses o greu eu gwaith, yn hytrach na’r gwaith gorffenedig; ac fel bod modd i’r rhai sy’n caru celf gael gofod ymlaciol i’w hastudio ochr yn ochr ag artistiaid, gan fwynhau paned a sgwrs yr un pryd!’
Cynhelir digwyddiad rhannu Ein Llais | Our Voice 2023 yn Theatr Stiwdio Glan yr Afon, Casnewydd, ddydd Sadwrn 25 Chwefror am 6.00yh. Mae tocynnau ar gael yn awr trwy ffonio 01633 656757, neu cliciwch yma.
