Mae Casnewydd Fyw yn falch iawn o gyhoeddi lansiad Benthycwyr Bywiog, menter newydd gyffrous sydd wedi'i chynllunio i helpu plant a theuluoedd i gael gafael ar offer chwaraeon cynhwysol yn rhad ac am ddim trwy eu llyfrgell leol.
Yn lansio fel rhaglen beilot yn Llyfrgell Tŷ Tredegar yn ystod yr wythnos sy'n dechrau ddydd Llun 26 Hydref, Mae Benthycwyr Bywiog wedi'i ddatblygu trwy gydweithrediad agos rhwng Casnewydd Fyw a Llyfrgelloedd Casnewydd i wneud chwaraeon a gweithgarwch corfforol yn fwy hygyrch i deuluoedd ledled Casnewydd.
Mae'r cynllun yn galluogi teuluoedd i fenthyca pecynnau gweithgareddau Benthycwyr Bywiog, sydd wedi’u cynllunio’n arbennig, yn llawn offer chwaraeon a syniadau am weithgareddau sy'n annog plant i fod yn egnïol, dysgu sgiliau newydd a mwynhau gweithgarwch corfforol gartref neu yn eu cymuned leol.
Mae’r pecynnau, sy’n addas ar gyfer plant 4 i 11 oed, yn cynnwys offer ar gyfer amrywiaeth o chwaraeon, gan gynnwys:
- Pêl-droed
- Rygbi
- Athletau
- Boccia
Mae'r holl offer a chanllawiau ar gyfer y gweithgareddau wedi'u cynnwys, gan ganiatáu i deuluoedd fwynhau'r pecynnau am ddim.
Trwy system archebu bwrpasol yn Llyfrgell Tŷ Tredegar, bydd teuluoedd yn gallu benthyg pecyn Benthycwyr Bywiog am hyd at dair wythnos ar y tro cyn ei ddychwelyd er mwyn i deulu arall allu ei fwynhau.
Nod y fenter yw lleihau rhwystrau i gymryd rhan trwy ddarparu mynediad at offer nad oes gan rai teuluoedd fel arall, tra hefyd yn annog plant i ddarganfod chwaraeon newydd a datblygu arferion gydol oes cadarnhaol o amgylch gweithgarwch corfforol.
Dywedodd Ellen Phillips, Swyddog Datblygu Chwaraeon Cymunedol a Gweithgarwch Corfforol yng Nghasnewydd Fyw:
"Rydym yn hynod gyffrous i lansio'r cynllun peilot Benthycwyr Bywiog mewn partneriaeth â Llyfrgell Tŷ Tredegar. Rydym yn gwybod y gall cael gafael ar offer wneud gwahaniaeth enfawr i gyfle plentyn i fod yn egnïol, ac mae'r fenter hon yn helpu i gael gwared ar rai o'r rhwystrau hynny.
"Trwy ddarparu pecynnau chwaraeon cynhwysol am ddim y gall teuluoedd eu benthyg a'u defnyddio gyda'i gilydd, rydym yn gobeithio ysbrydoli mwy o blant i fwynhau gweithgarwch corfforol, rhoi cynnig ar chwaraeon newydd a magu hyder trwy symud a chwarae."
Bydd y rhaglen beilot yn rhoi mewnwelediad gwerthfawr i’r ffordd mae teuluoedd yn ymgysylltu â'r pecynnau a bydd yn helpu i lunio cyfleoedd yn y dyfodol i ehangu'r fenter ar draws llyfrgelloedd eraill yng Nghasnewydd.
Trwy ddod â phŵer llyfrgelloedd a chwaraeon cymunedol at ei gilydd, mae Benthycwyr Bywiog yn cynrychioli dull arloesol o gefnogi lefelau iechyd, lles a gweithgarwch corfforol plant, gan sicrhau bod mwy o bobl ifanc yn cael y cyfle i fwynhau manteision bod yn egnïol.
Dylai teuluoedd sydd â diddordeb mewn benthyg pecyn Benthycwyr Bywiog gysylltu â Llyfrgell Tŷ Tredegar i gael gwybodaeth archebu o'r wythnos sy'n dechrau 26 Hydref.
