Yma yn Casnewydd Fyw, rydym yn cynnig cynifer o ffyrdd o ymlacio, bod yn heini, gwneud ffrindiau newydd a dod o hyd i ddiddordebau newydd. O ddosbarthiadau campfa, i'r trac rhedeg, o nofio cyhoeddus i weithdai ac o berfformiadau theatr i ddangosiadau sinema, mae ein darpariaeth chwaraeon a hamdden ar gyfer Casnewydd heb ei thebyg. Rydym yn falch o bopeth a wnawn ar gyfer ac o fewn ein cymunedau, ac fel rhan o thema Mis Ymwybyddiaeth o Straen 2026, "Byddwch y Newid", rydym yn eich annog i gymryd perchnogaeth o'ch ymwybyddiaeth ofalgar a'ch iechyd meddwl a manteisio ar y cyfleoedd chwaraeon a hamdden a gynigir i chi yn y ddinas.
Sut y gall Chwaraeon a Hamdden helpu i reoli Straen:
· Maen nhw’n rhyddhau hormonau sy’n gwneud i chi deimlo'n dda - Mae gweithgarwch corfforol yn rhoi hwb i endorffinau, sy'n naturiol yn codi hwyliau ac yn lleihau teimladau o straen neu o orbryder. P'un a yw'n daith gerdded gyda Momentwm, dosbarth HYROX yn y Pentref Chwaraeon neu ddosbarth ioga yng Nglan yr Afon - byddwch chi'n teimlo'n well ar ôl hynny.
· Maen nhw’n lleihau tensiwn cyhyrau – Mae symudiad yn helpu i ymlacio cyhyrau tynn a achosir gan straen hir, gan leddfu anghysur corfforol. Yn Casnewydd Fyw mae gennym amrywiaeth o ddosbarthiadau llai heriol a all hefyd eich helpu i ymestyn ac ymlacio fel ein dosbarthiadau ioga ar ddydd Mawrth! Ond - gall unrhyw symudiad helpu i leihau tensiwn cyhyrau, ar yr amod eich bod yn ddigon iach i ymarfer corff ac, wrth gwrs, gwnewch yn siŵr eich bod chi'n ymestyn ar ôl hynny.
· Maen nhw’n gwella ansawdd cwsg – Mae ymarfer corff rheolaidd a hamdden egnïol yn cefnogi cwsg dyfnach, mwy gorffwysol, gan wneud straen yn haws i'w reoli. P'un a ydych chi'n rhiant nad ydych yn cael digon o gwsg, rydych chi yn y cyfnod cyn y menopos, neu’n cael trafferth dod o hyd i amser ar gyfer digon o gwsg, bydd cymryd amser i chi'ch hun yn gwella ansawdd eich cwsg - hyd yn oed os nad ydych chi'n cael mwy o gwsg mewn gwirionedd.
· Maen nhw’n darparu seibiant meddyliol – Mae gweithgareddau hamdden fel nofio, cerdded, mynd i’r sinema neu’r theatr yn rhoi amser i'ch meddwl i ffwrdd o bwysau dyddiol.
· Maen nhw’n adeiladu gwytnwch i straen – Mae ymarfer corff yn hyfforddi'ch corff a'ch meddwl i ymdopi'n well â heriau corfforol ac emosiynol. Maen nhw’n tynnu ein sylw, sydd i'w groesawu - p'un a yw'n well gennych hyfforddi ar eich pen eich hun neu mewn grŵp fel ein teithiau cerdded a reidiau Momentwm, neu ein dosbarthiadau ymarfer corff grŵp.
· Maen nhw’n annog ymwybyddiaeth ofalgar – Mae gweithgareddau fel ioga, ymestyn, beicio neu gelf a chrefft yn helpu i ganolbwyntio sylw ar y foment bresennol. Cadwch lygad ar ein cyfryngau cymdeithasol i weld beth sydd ar ddod, a rhoi cynnig ar rywbeth newydd i'ch helpu i ddod yn fwy ymwybodol y mis hwn.
· Maen nhw’n rhoi hwb i hyder a hunanbarch - Gall cyflawni nodau boed hynny i gwblhau her gerdded o’r Soffa i 5k Momentwm, neu ymuno â dosbarth neu grŵp arall wella hunangred, gan leihau straen sy'n gysylltiedig â hunanamheuaeth.
· Maen nhw’n cynnig cysylltiad cymdeithasol – Mae gweithgareddau ymarfer corff a hamdden mewn grŵp yn creu cyfleoedd i gysylltu, chwerthin a theimlo eich bod yn cael eich cefnogi. Mae Ysbrydoli, bod yn Hapusach ac Iachach yn bwysig i ni yn Casnewydd Fyw, ac mae rhywbeth at ddant pawb.
· Maen nhw’n gwella egni a ffocws – Mae symud rheolaidd yn cynyddu lefelau egni, gan eich helpu i deimlo'n fwy abl i ymdopi â’r ffactorau sy’n peri straen.
· Maen nhw’n creu trefn a rheolaeth – Mae amserlennu ymarfer corff neu amser hamdden yn darparu strwythur, gan eich helpu i deimlo'n fwy cytbwys ac mewn rheolaeth. Mae'n ychydig o amser ar eich cyfer CHI, boed hynny ar gyfer ffilm rydych chi wedi bod eisiau ei gweld, coffi gyda ffrind neu roi cynnig ar ddosbarth newydd.
