Bob mis Mawrth, mae Theatr a Chanolfan Gelfyddydau Glan yr Afon yn dathlu Diwrnod Rhyngwladol y Menywod gyda rhaglen wych o berfformiadau a sesiynau blasu am ddim, i gyd gyda ffocws i fenywod.
Ddydd Sadwrn 7 Mawrth rhwng 10am a 4pm, bydd Glan yr Afon yn cynnal ei ddigwyddiad Diwrnod Rhyngwladol y Menywod blynyddol, gan ddod â cherddorion o fri, grwpiau cymunedol a menywod lleol ysbrydoledig at ei gilydd ar gyfer diwrnod bywiog o greadigrwydd a thrafodaeth. Drwy gydol y dydd bydd perfformiadau byw, trafodaethau panel, arddangosfeydd creadigol a digon o gyfleoedd i gysylltu ag eraill mewn amgylchedd croesawgar a chefnogol.
Bydd lansiad arbennig ar gyfer Gwobrau Bwrsariaeth Fforwm Menywod Casnewydd 2026, gan nodi 30 mlynedd o gefnogi menywod yng Nghasnewydd i gyflawni eu nodau. Gall ymwelwyr ddysgu mwy am y fwrsariaeth, cwrdd â'r tîm a chael gwybod sut i wneud cais.
Mae'r rhaglen hefyd yn cynnwys trafodaethau gyda grŵp theatr Herstory ar eu cynhyrchiad newydd Pianoforte: The Story of Mary Frost, sgwrs gyda Noni Lewis am ei drama Grip of Life, sesiwn holi ac ateb gydag awduron benywaidd ar gyflawni eich nodau, a pherfformiad ysgrifennu creadigol gan fenywod sy'n rhan o brosiect ‘Gwent Women Will Unite’ y Wallich.
Mae digon o gyfleoedd i blant ac oedolion grefftio a chreu, gan gynnwys gweithgareddau celf a chrefft, gweithdy Street Fairy gyda'r artist Stephanie Roberts, Blychau Atgofion gydag Age Alive, ac amrywiaeth o weithdai creadigol a mynegiannol. Gall ymwelwyr hefyd gymryd rhan mewn Ioga i Fenywod yn Unig (14+), Dawnsio Bollywood a chyflwyniad i Qi Gong, ochr yn ochr â sesiynau cerddoriaeth fyw a pherfformiadau côr cymunedol.
Bydd Cymorth i Fenywod Cyfannol yn cyflwyno gweithdy a fydd yn archwilio ffyrdd ymarferol o gefnogi a grymuso menywod yn ein cymuned, gan dynnu sylw at sut y gall gweithredoedd bach wneud gwahaniaeth ystyrlon.
Mae croeso i westeion aros drwy'r dydd a mwynhau amrywiaeth o ddigwyddiadau, neu fynd a dod fel y mynnant. Bydd yr holl ddigwyddiadau yn ystod y dydd yn cael eu cynnal rhwng 10am a 4pm, am ddim, a does dim angen cadw lle ymlaen llaw.
Bydd y dathliadau'n parhau i'r nos gyda dangosiad am ddim o Prime Minister (12A) am 5pm (argymhellir cadw lle), ac yna Gala Comedi Diwrnod Rhyngwladol y Menywod arbennig am 7:30pm, wedi’i gyflwyno gan y tîm y tu ôl i Ŵyl Gomedi Machynlleth.
Dywedodd Sally-Anne Evans, Uwch Gydlynydd Datblygu Creadigol yn Theatr a Chanolfan Gelfyddydau Glan yr Afon: “Mae Diwrnod Rhyngwladol y Menywod bob amser yn un o uchafbwyntiau ein blwyddyn. Mae'n gyfle i ddathlu cyflawniadau, creadigrwydd a gwytnwch menywod yn ein cymuned, wrth greu lle ar gyfer sgyrsiau pwysig a chysylltiadau newydd. Edrychwn ymlaen at groesawu pawb am yr hyn sy'n addo bod yn ddiwrnod ysbrydoledig a chalonogol arall.”
Am fanylion llawn y digwyddiad ewch i: Casnewydd Fyw | Diwrnod Rhyngwladol y Menywod
